საქართველოს საერთაშორისო საარბიტრაჟო ცენტრი არის

საქართველოში პირველი საარბიტრაჟო ინსტიტუტი, რომელიც ჩამოყალიბებულია არასამეწარმეო (არაკომერციული) იურიდიული პირის ფორმით და შექმნილია საუკეთესო საერთაშორისო საარბიტრაჟო პრაქტიკის გათვალისწინებით. იგი წარმოადგენს ბიზნეს დავების მოგვარების ყველაზე ეფექტურ საშუალებას კავკასია-შავიზღვისპირეთისა და კასპიის რეგიონის მასშტაბით.


საქართველოს საერთაშორისო საარბიტრაჟო ცენტრი ბიზნესომბუდსმენთან ერთად რეგიონულ შეხვედრებს მართავს

საქართველოს საერთაშორისო საარბიტრაჟო ცენტრის (GIAC) უფროსმა იურისტმა, დავით ედილაშვილმა ბიზნეს ომბუდსმენთან ერთად რეგიონული შეხვედრების ფარგლებში ბიზნესს არბიტრაჟის და მედიაციის უპირატესობების შესახებ მიაწოდა ინფორმაცია. ამასთან, მან ისაუბრა ახალ კანონპროექტზე მედიაციის შესახებ, რომელიც უკვე ინიცირებულია საქართველოს პარლამენტში. ღონისძიებები ქუთაისსა და ფოთში გაიმართა.

დავით ედილაშვილმა მიმოიხილა არბიტრაჟისა და მედიაციის ძირითადი მახასიათებლები, ხაზი გაუსვა ალტერნატიული გზების უპირატესობებს დროის სიმცირისა და პროცესის მოქნილობის თვალსაზრისით. აღნიშნული შეხვედრების მთავარი მიზანია საქართველოში არბიტრაჟისა და მედიაციის შესახებ ცნობადობის ამაღლება, რაც მნიშვნელოვნად შეუწყობს ხელს ამ მიმართულებების განვითარებას ქვეყანაში.

შემდეგი შეხვედრები გაიმართება თელავსა და ახალციხეში. შეხვედრების სერია იმართება ევროკავშირისა (EU) და გაეროს განვითარების პროგრამის (UNDP) მხარდაჭერით.

 

მიმაგრებული სურათები